मन फितूर फितूर

चांदणं टिपुर
मन फितूर फितूर
पाण्यामधे चन्द्र
आणि मन आतुर

टळटळीत दुपार
मन रुखं रुखं
गुलाबी पहाट
मन धुक धुक

सोसाट्याच्या सरी
मन आडोसा आडोसा
श्रावणाची उन्ह
आणि मन कवडसा

सुर्यबिम्ब बुड्ताना
मन आरक्त आरक्त
आणि रान फुलताना
मन प्राजक्त प्राजक्त

वाळवंटी घामाघुम
मन आसुस आसुस
दारी सुकलेलं रोप
मन पाउस पाउस

मंदिरात घंटानाद
मन अभंग भूपाळी
गाभार्यात नंदादीप
मन आरास दिवाळी